Архивы: Новости

Махамбет атындағы академиялық қазақ драма театры шығармашылық ұжымы 2026 жылғы наурыз–сәуір айларында Атырау облысының аудандарына гастрольдік іс-сапарға шығады.

📍 Жылыой ауданы (30–31 наурыз, 1 сәуір)

• Қосшағыл ауылы — 30 наурыз

• Майкөмген ауылы — 31 наурыз

• Құлсары қаласы — 1 сәуір

Қойылымдар:

• 11:00 — Г. Дженнингстің «Ән сал» ертегісі

• 19:00 — А. Володиннің «Кездесу мен қоштасу» мелодрамасы

📍 Құрманғазы ауданы (16–18 сәуір)

• Орлы ауылы — 16 сәуір

• Жыланды ауылы — 17 сәуір

• Құрманғазы ауылы — 18 сәуір

Уақыты:

• 11:00 — «Ән сал»

• 19:00 (18 сәуір — 18:00) — «Кездесу мен қоштасу»

Театр ұжымы барша көрермендерді мәдени кештерге шақырады.

Құрметті көрермендер!
Сіздердің назарларыңызға Наурыз айына арналған театр репертуарын ұсынамыз. Көктемнің алғашқы айы – жаңару мен шабыттың, жарқын эмоциялар мен жаңа әсерлердің бастауы. Табиғат түлеп, айнала жандана түсетін бұл мезгіл – рухани демалып, мәдени ортада ерекше сәттер өткізуге таптырмас уақыт.
Наурыз айында театр сахнасында көрермендерге арналған мазмұнды әрі әсерлі қойылымдар, жан дүниені тербейтін драмалар, көңілді комедиялар және отбасылық кештерге арналған шығармалар ұсынылады. Әр спектакль – көрермен мен өнердің жүрек тоғысар ерекше кездесуі.
Театр – тек өнер ордасы ғана емес, жанға тыныштық сыйлайтын, ойға ой қосатын рухани кеңістік. Сондықтан өзіңізге және жақындарыңызға мәдени демалыс сыйлап, көктемді әсем әсерлермен қарсы алуға шақырамыз.
Орындарыңызды алдын ала алып үлгеріңіздер!
Сіздерді театрда асыға күтеміз! 💜

🎫 Билеттерді Ticketon.kz сайтынан және театр кассасынан ала аласыздар.
📞 Қосымша ақпарат: +7 702 692 7987 (Рассалия)

Театрымызда өткен ІІ театрішілік фестиваль өз мәресіне жетті. Өнер мерекесі аясында арнайы шақырылған театр сыншылары сегіз қойылымды тамашалап, әр спектакльге кәсіби тұрғыда жан-жақты баға берді.
Бірнеше күнге созылған фестиваль барысында ұжымның шығармашылық ізденісі, режиссерлік шешімдері мен актерлік шеберлігі кеңінен сараланды. Сыншылар қойылымдардың көркемдік деңгейі, сахналық мәдениеті және тақырыптық өзектілігіне тоқталып, мазмұнды пікірлері мен нақты ұсыныстарын ортаға салды.
Сонымен қатар фестиваль шеңберінде дәрістік сабақтар ұйымдастырылып, театр мамандары мен әртістерге арналған кездесулер өтті. Онда «Қазіргі әлемдік театрлардың даму тенденциялары» және «Қазақстандағы театр фестивальдерінің даму үрдісі» тақырыптары кеңінен талқыланды. Бұл кездесулер шығармашылық көкжиекті кеңейтіп, кәсіби тәжірибе алмасуға мүмкіндік берді.
Фестиваль тек бәсеке алаңы ғана емес, шығармашылық өсу мен тәжірибе бөлісудің маңызды кезеңі екені тағы бір мәрте дәлелденді.
Осылайша, ІІ театрішілік фестиваль өз қорытындысын жасап, жаңа белестерге бағыт алған шығармашылық маусымның жарқын белесіне айналды.

ІІ Театрішілік фестиваль аясында өткен баспасөз мәслихатында фестивальдің мақсаты мен маңызы, қатысатын қойылымдар мен шығармашылық ұжымдардың дайындығы кеңінен таныстырылды. Кездесу барысында ұйымдастырушылар фестивальдің басты ерекшеліктеріне тоқталып, бұл жоба театр ішіндегі шығармашылық бәсекені күшейтіп, әртістер мен режиссерлердің жаңа ізденістеріне жол ашатынын атап өтті.
Фестиваль күндері көрермен назарына түрлі жанрдағы қойылымдар ұсынылып, сахналық шешімдер мен актерлік жұмыстар кәсіби тұрғыда бағаланбақ. Шара театр ұжымының шығармашылық әлеуетін шыңдап, тәжірибе алмасуға мүмкіндік беретін маңызды алаңға айналмақ.
Алдағы фестиваль күндері көрерменге әсерлі қойылымдар мен тың сахналық шешімдер ұсынылып, театр өміріне жаңа қарқын бермек. Фестиваль өнер ұжымының әлеуетін танытатын тағылымды әрі мазмұнды мәдени оқиға болмақ!

2026 жылдың 5 ақпан күні Атырау облысы Мәдениет және тілдерді дамыту басқармасының басшысы Әбіл Жоламанов Атырау облыстық Махамбет атындағы академиялық қазақ драма театрының 2025 жыл қорытынды есебін тыңдап, алдағы 2026 жылға арналған жұмыс жоспарымен танысты.
Кездесу барысында театрдың өткен жылғы шығармашылық жетістіктері, жаңа қойылымдар, фестивальдерге қатысу көрсеткіштері, көрерменмен байланыс кеңінен талқыланды. Сондай-ақ ұжымның кәсіби дамуы, жас мамандарды қолдау, гастрольдік сапарлар мен жаңа жобалар жөнінде нақты жоспарлар ұсынылды.
Ал алдағы жыл — жаңа идеялар, тың жобалар, батыл эксперименттер мен үлкен шығармашылық серпілістер жылы болмақ. Театр ұжымы көрерменді әлі де талай тосын сыймен қуантуды жоспарлап отыр.
Алда — жаңа белес, жаңа маусым, жаңа әсер!

10–15 ақпан аралығында театрымызда нағыз өнер сүйер қауым асыға күтетін театр ішілік фестиваль өтеді. Бұл – шығармашылық ізденіс, кәсіби шеберлік және сахналық өнердің үздік үлгілері тоғысатын ерекше мәдени оқиға.
Фестивальдің басты ерекшелігі – жыл үздіктерін кәсіби театр сыншыларының анықтауы. Яғни, әр қойылымға кәсіби көзқарас, әділ баға беріліп, сахнадағы ең үздік актерлік жұмыстар мен режиссерлік шешімдер сараланады.
Фестиваль аясында көрермендерге соңғы маусымдағы ең таңдаулы қойылымдар ұсынылады. Әр кеш – терең ой, шынайы эмоция және ұмытылмас әсерге толы болмақ.
Фестивальге қатысушы қойылымдар:
«Урод» — 10 ақпан, 19:00
«Сіз кімсіз?!» — 11 ақпан, 14:00
«Жоғалғандар» — 11 ақпан, 19:00
«Қасым хан» — 12 ақпан, 19:00
«Қуыршақтар» — 13 ақпан, 14:00
«Кездесу мен қоштасу» — 13 ақпан, 19:00
«Асауға тұсау» — 15 ақпан, 19:00
Билеттерді театр кассасынан және Ticketon.kz сайтынан сатып алуға болады.
Өнердің озығын бірге тамашалап, театр әлеміндегі үздіктерге куә болыңыз!

Ақпан айында театр сахнасында көрермендерді шабытқа, терең ойға және шынайы эмоцияға бөлейтін ерекше қойылымдар күтіп тұр. Әр кеш – жаңа әсерге толы, ал әр спектакль – жүрекке жол табатын әсерлі кездесу болмақ.

Осы айдағы репертуар аясында көрермендерге мазмұны терең, көркемдік шешімі өзгеше қойылымдар ұсынылады.

Сонымен қатар, 10–15 ақпан аралығында театрішілік фестиваль өтетінін хабарлаймыз. Фестиваль күндері сахнада тың ізденістерге толы шығармашылық эксперименттер мен ерекше форматтағы қойылымдар көрсетіледі.

Билеттерді театр кассасынан және Ticketon.kz сайтынан сатып алуға болады.

Барша көрермендерді ақпан айындағы театр қойылымдарына шақырамыз!

10 желтоқсан күні көптен күткен «Үзілген үміт» драмалық қойылымының премьерасы сәтті өтті. Терең психологиялық мазмұнға құрылған қойылым көрермен тарапынан ерекше қызығушылық тудырып, залды толтырған көрерменге үлкен әсер қалдырды.

Қойылымда ана болуды армандаған Толқынның тағдыры арқылы әйел жанындағы нәзік сезімдер, сатқындық пен сенімнің күйреуі шынайы бейнеленді. Жарынан ғана емес, ең жақын құрбысынан соққы алған басты кейіпкердің ішкі жан айқайы көрерменді бейжай қалдырмай, адамгершілік пен адалдық туралы терең ойға жетеледі.

Режиссер Ақылбек Хамитовтің сахналық шешімі мен қойылым ырғағы оқиғаның драмалық салмағын күшейтсе, суретші Айдана Жаңбырбайдың көркемдік безендіруі спектакльдің атмосферасын тереңдете түсті. Әр көрініс көрерменді кейіпкерлердің жан дүниесіне жақындатып, эмоциялық әсерін арттырды.

Басты рөлдердегі актерлер өз кейіпкерлерін шынайы әрі сенімді сомдап, көрермен ықыласына бөленді. Алтынгүл Еділбай (Толқын), Дарина Марат (Ажар), Рахман Ғабитұлы (Болат) және Бекасыл Арманұлы (Дәрігер) орындауындағы образдар қойылымның негізгі идеясын толық ашуға мүмкіндік берді.

«Үзілген үміт» премьерасы көрерменге терең ой салып, өмірдегі сенім, үміт және тағдыр тақырыптарын қайта бағамдауға шақырған маңызды мәдени оқиға болды.